काठमाडौं– सरकारले इजरायल आक्रमणमा परेर मृत्यु भएका १० जना नेपालीको सम्मानमा मंगलबार राष्ट्रिय शोक घोषणा गरेको छ ।

सोमबार बसेको मन्त्रिपरिषदको आकस्मिक बैठकले मृतकप्रति श्रद्धाञ्जली अर्पण गर्दै घाइतेहरुको शीघ्र स्वास्थ्यलाभको कामना गरेको छ ।

बैठकपछि सरकारका प्रवक्ता एवं सञ्चारमन्त्री रेखा शर्माले दिवंगत नागरिकको सम्मान गर्दै राष्ट्रिय शोक घोषणा गरेर देशभरका सरकारी कार्यालय र विदेशस्थित नेपाली नियोगहरुमा राष्ट्रिय झन्डा आधा झुकाउने निर्णय गरेको बताएकी छिन् ।
उनका अनुसार परराष्ट्र मन्त्रालयले इजरायल सरकारसँग समन्वय गरी मृतकको शव ल्याउने तयारी भैरहेको छ ।

सरकारले मृतक परिवारलाई राहत स्वरुप १० लाख रुपैयाँ उपलब्ध गराउने निर्णय भएको छ । इजरायलस्थित नेपाली दूतावासले त्यहाँ सरकारसँग समन्वय गरेर बेपत्ता नेपालीको खोजीमा तीव्रता दिने र घाइतेहरुको उपचारका लागि समन्वय गर्ने मन्त्रिपरिषद्ले निर्णय गरेको छ ।