काठमाडौं–नयाँ वर्षको पहिलो दिनमै मध्यजापानमा शक्तिशाली भूकम्प गएको छ ।

जापानको तटीय नोतो क्षेत्रमा ७ दशमलव ६ म्याग्निट्यूडको भूकम्प गएको समाचारसंस्था रोयटर्सले जनाएको छ । स्थानीय समयानुसार दिउँसो ४ बजेर ६ मिनेटमा पहिलो पटक ५ दशमलव ७ म्याग्निट्यूडको भूकम्प मापन गरिएपछि त्यहाँ थप भूकम्पहरू आएको जापानको मौसम निकायले जनाएको छ ।

पहिलो भूकम्प गएपछि एक घण्टाको अवधिमा ७ दशमलव ६ म्याग्निट्यूडको सहित कम्तीमा ५ वटा भूकम्प मापन गरिएको थियो ।

सबैभन्दा शक्तिशाली भूकम्प अनामिजु सहरनजिकै गएको बताइएको छ। भूकम्पपछि त्यहाँ सुनामी आउने चेतावनी जारी गरिएको छ । त्यहाँ रेल सेवा बन्द गरिएको छ ।

समुद्री तटमा रहेका मानिसहरूलाई उच्च भागतर्फ जान अधिकारीहरूले आग्रह गरेका छन्।
जापानी राष्ट्रिय प्रसारक एनएचकेका अनुसार नोटो क्षेत्रको इशिकावा जिल्लाको तटीय क्षेत्रबाट मानिसहरूलाई “तत्काल उच्च भागमा जान” निर्देशन दिइएको छ।

एनएचकेका अनुसार झन्डै पाँच मिटरजति अग्लो छाल नोतो क्षेत्रमा पुगेको छ। अधिकारीहरूले छिमेकी निगाता र तोयामा जिल्लामा पनि सुनामीको चेतावनी जारी गरेका छन्। ती क्षेत्रमा झन्डै तीन मिटर अग्ला छाल पुग्न सक्ने चेतावनी दिइएको छ। भूकम्पपछि भएको क्षतिको यकिन विवरण आइसकेको छैन।

जापानमा भूकम्प जानु नौलो नभए पनि सुनामीले ठूलो धनजनको क्षति गराउन सक्ने ठानिएको छ। जापान सरकारका प्रवक्ता योशिमासा हयाशीले उक्त क्षेत्रका बासिन्दालाई थप भूकम्पका लागि तयार रहन चेतावनी दिएका छन् ।
साभारः बीबीसी