काठमाडौं – नुवाकोटमा अपहरण गरी फिरौती माग्ने दुई जना पक्राउ परेका छन् ।

ककनी गाउँपालिका–४ का सूर्यबहादुर तामाङलाई अपहरण गरेर ७ लाख फिरौती लिन आएका दुई जनालाई जिल्ला प्रहरी कार्यालय नुवाकोटले पक्राउ गरेको छ ।

प्रहरीका अनुसार पक्राउ पर्नेमा शिवपुरी गाउँपालिका– ८ का चन्द्रबहादुर तामाङ र ककनी गाउँपालिका–४ का राजकुमार तामाङ रहेका छन् । प्रहरीका अनुसार गत सोमबार राति बिरामी लिन घर काहुलेबाट ककनी जाने क्रममा सूर्यबहादुर तामाङलाई नियन्त्रणमा लिई ७ लाख रुपैया फिरौती लिन २ जना पक्राउ परेको उक्त घटनामा संलग्न अन्य फरार रहेकाले खोजी कार्य जारी रहेको छ ।

सूर्यबहादुरलाई अपहरण गरेर नुवाकोटको पञ्चकन्या गाउँपालिका–५ पुर्याएर आफन्तसँग फिरौती माग्ने क्रममा तोकिएको रकम दिने सहमति भएपछि पीडित पक्षले प्रहरीले जानकारी गराएका थिए । उनीहरुलाई प्रहरीले अपहरण तथा शरीर बन्धक मुद्दामा हिरासतमा राखी अनुसन्धान गर्न नुवाकोट जिल्ला अदालतबाट ७ दिनको म्याद लिएर थुनामा राखिएको छ ।